طرق وخطوات انشاء حمامات السباحة

انواع حمامات السباحة

• الأوفر فلو Over flow
• والاسكيمر Skimmer

خطوات تنفيذ حمام السباحة

والتجهيزات الخاصة بالسباكة والكهرباء لتنفيذ حمامات السباحة

وردى كالآتي

الأول لما نختار حمام السباحة لازم نعرف انه فيه نوعين من حمامات السباحة تختلف فيما بينها من حيث منسوب وشكل المياة فى الحمام وطريقة سحب المياة الفائضة

النوع الأول – سكيمر skimmer

وبيكون فيه منسوب المياة أقل من حافة الحمام

وهو الشائع لسهولة تنفيذه وتكلفته أقل ومنسوب المياة مرتبط بمنسوب جهاز الاسكيمر حيث ان منسوب مياة الحمام بيكون فى منتصف الاسكيمر تماما والمياة الزايده عن نصه بتدخل فى ماسورة الصرف المتصلة به

والاسكيمر بيتثبت فى جدار حمام السباحة

وماسورة الصرف المتصلة بالاسكيمر بتصل لغرفة الماكينات لتدخل على فلتر الترشيح

حنشرح الكلام ده بعدين

والاسكيمر مسؤل عن تصريف المياة الزائدة وبالتالى تحديد منسوب المياة فى حمام السباحة

ومسؤول عن حجز الشوائب ذات الحجم الكبير من اوراق الشجر وأكياس البلاستيك وما شابهها عن طريق شبكة او صفاية بداخله

ومهم جدا انك تعرف إن عمق الحمام فى النوع ده بيتحسب من نص الاسكيمر حتى منسوب الارضية

دى فكره مبسطة عن نوع الاسكيمر قبل ماندخل فى التفاصيل بعدين

النوع التانى – بنسميه اوفر فلو overflow

والنوع ده منسوب مياة الحمام بتصل لحافته وبتنساب من الحافة لمجرى محيطة بالحمام وبتكون فى نفس منسوب الارضية حول الحمام

والمجرى معمولة من نفس خرسانة الحمام حواليه بتنزل فيها المياة الزايدة لتصل لغرفة الماكينات

يعنى المجرى بتقوم بعمل الاسكيمر فى النوع السابق

والصورة دى للمجرى بعد تشطيب الحمام

المجرى دى بينزل فيها المياة الزايدة لتصل لغرفة الماكينات ليتم ترشيحها واعادتها مرة اخرى داخل الحمام بطريقة حنعرفها لما نشرح دورة المياة فى حمام السباحة

والنوع ده مكلف لوجود المجرى حواليه

وبيحتاج خزان موازنة زى ما حنعرف بعدين

________________________________

ولما بنصمم حمام السباحة بنعمل جانب بعمق مناسب للاطفال والعمق ده بيتراوح بين 0.60 إلى 1.00 متر

والجانب الآخر بعمق 1.60 إلى 1.80متر

وبيكون فيه ميل فى الارضية

مهم ان يكون ميل الارضية فى حدود 10 إلى 20%

بمعنى لو كان فارق العمق بين جانبى حمام السباحة 1.00 متر مثلا

يكون المسافة الأفقية للأرض المائلة 10متر لتحقيق نسبة ميل 10%

أو تكون المسافة الأفقية للأرض المائلة 5متر لتحقيق نسبة ميل 20 %

حتى لاينزلق المستحم من المنطقة ذات العمق البسيط للعمق الكبير

ويفضل تثبيت حبل حاجز من الفوم على سطح المياة لتحديد الفاصل بين المنطقتين

ويفضل وضع يافطة عند كل عمق وعند بداية الميل

أو يكون فى تصميم الحمام نفسه حاجز بالمبانى لمنطقة الاطفال

ولازم تكون الارضية حول حمام السباحة لها ميول بسيط 0.5 سم فى المتر

ويكون اتجاة الميول عكس اتجاه الحمام على صفايات صرف

حتى لاتسقط مياة الارضية المتسخة فى الحمام وتعمل لود على الفلتر

ولازم تكون الارضية غير زلجة من مواد شبه خشنة حتى لاينزلق المستحمين

ولازم يكون فى دش بجوار الحمام يستخدمه المستحمين قبل النزول للحمام

__________________________

حساب عمق حفر حمام السباحة

نفترض قطاع الحمام باللوحة الهندسية

نحسب ارتفاع الحمام

وسمك لبشة الارضية

وسمك الخرسانة العادية

اجمالى الارتفاع 2.50 متر

نعمل حساب تشطيب السيراميك لظهر جدار حمام السباحة 5سم

يبقى اجمالى الارتفاع 2.55 متر

الأول نحدد بعلامة (شيرب) منسوب تشطيب الارضية حول حمام السباحة

ومن العلامة دى نستلم عمق الحفر المطلوب إللى هو -2.55

لاحظ أنه تم حساب عمق الحفر لأكبر عمق موجود باللوحة الهندسية

________________________________

حساب طول وعرض الحفر

عرض الحمام من الداخل (النضيف) 6.00 متر

وطول الحمام من الداخل 12.00 متر

لتسهيل التنفيذ بيتم بناء حوائط من الطوب حوالين حيز الحمام مع حساب سمك جدران الحمام الخرسانية

بمعنى مقاس الحمام الداخلى 12×6

نفترض سمك خرسانة الجدار 20 سم

فيكون مقاس الحمام من الخارج

12.40 × 6.40

هذا المقاس هو مقاس المبانى من الداخل

وبالتالى حيكون مقاس المبانى من الخارج

12.80 × 6.80 متر

على افتراض أن سمك الطوبة 20 سم

وبالتالى حيكون مقاس خرسانة النضافة بكامل حيز الحمام

12.80 × 6.80 متر

ويفضل ان تكون الخرسانة العادية لفرشة النضافة مطرطفة أو أزيد عن المبانى ب 20 سم

فحيكون مقاس الخرسانة العادية فى هذه الحالة

13.20 × 7.20 متر

وقبل صب خرسانة النظافة يتم دك التربة جيدا حتى لاتهبط مستقبلا محدثة شرخ فى خرسانة الحمام

________________________________

مبانى حمام السباحة

المبانى وظيفتها انها بديل عن نجارة سند الخرسانة من الخارج

بعد صب خرسانة النظافة بيتم تحديد مقاسات حمام السباحة و ( أد ) المبانى ويراعى التأكد من زوايا الحمام ان تكون قائمة تماما حتى لاتحدث شطلة أو سمكه عند تركيب سيراميك الارضية

وان تكون المبانى من الطوب الاسمنتى المصمت وليس الطوب الأحمر لأنه شره للماء

وسمك المبانى لايقل عن سمك طوبة أو طوبة ونص

ويتم عمل أكتاف مبانى كل 3متر أو أقل لتدعيم المبانى

وان تكون مونة المبانى شديدة لاتقل عن 7شكاير أسمنت على متر مكعب رمل

وان يكون ضهر المبانى للحوائط أفقية تماما

حنراعى ده فى المبانى وعند صب خرسانة الحوائط

وعند تركيب السيراميك للحوائط

لان مياة الحمام بتكون أفقية تمام وحتكشف اى ميل فى أفقية ضهر حوائط الحمام

وان يتم الردم حول المبانى من الخارج تباعا أثناء البناء حتى يكون الردم دعامة وساند للمبانى أثناء صب خرسانة الحوائط

وان يتم رش المبانى لتكون رطبة لمدة 3 أيام على الأقل لاتمام عملية الإماهة للاسمنت

بعد الانتهاء من المبانى

يتم بياض ( محارة ) السطح الداخلى للمبانى

ثم عزل السطح الداخلى للمبانى مع أرضية خرسانة النظافة وتغطية عزل الارضية بطبقة مونة حماية حتى لايتأثر العزل اثناء النجارة والحدادة

ملحوظة مهمة جدا

قبل العزل يفضل تركيب الاسكيمر لو كان نوع الحمام اسكيمر لان بعض انواع الاسكيمر سمكها اكبر من سمك خرسانة حائط الحمام وبتحتاج تدخل قليلا فى المبانى

فلو تم تركيب الاسكيمر بعد الانتهاء من عزل المبانى حيتم تكسير المبانى و معاها العزل لتركيب الاسكيمر وده غلط كبير

________________________________

تسليح أرضية وحوائط حمام السباحة

بيتم أولا رص حديد الارضية وبتكون غالبا لبشة بإرتفاع معين طبقا للتصميم الانشائ ومن شبكتين حديد بينهم كراسى حديد

وبنراعى رفع حديد اللبشة عن الارضية لتحقيق غطاء خرسانى لا يقل عن ٥سم

وبيتم تثبيت حديد الحوائط بكامل إرتفاع الحائط مرة واحدة بدون وضع أشاير متر الاول ثم استكمالها نظرا لأن ارتفاع الحوائط بتكون ارتفاعها فى حدود مترين فقط

ويراعى الاتى:

الحديد الرأسى بيكون بزاوية وصل مع حديد الارضية بطول لا يقل عن متر

بيتم تثبيت الحديد الرأسى المجاور للمبانى أولا ثم تربيط الحديد الافقى( البراندات )

ثم الحديد الرأسى للشبكة الثانية ثم الحديد الافقى لنفس الشبكة

بمعنى ترتيب الحديد رأسى افقى للشبكة الأولى ثم رأسى افقى للشبكة الثانية

ونثنى نهايات الاسياخ الرأسية بزاوية صغيرة بسمك الحائط

ومهم جدا تقوية الكورنر بين كل جانبين

ودة بيتم عن طريق الحديد الافقى ( البراندات )

وده بيتم بكذا طريقة

________________________________

صب خرسانة حمام السباحة

بيتم صب الارضية ( اللبشة ) أولا

وبعدها بيوم بيتم تقوية نجارة الحوائط لصبها وده لصعوبة تقوية نجارة الحوائط قبل صب الارضية

ومننساش تثبت شريط الوتر استوب فى اسفل الحائط بين شبكتين الحديد وعمل كيكر (رقبة خرسانة) جزء من خرسانة الحائط أثناء صب الارضية

________________________________

تمديدات السباكة لحمام السباحة

الاول لازم تعرف ان

تمديد مواسير السباكة بتتم بعد عمل شبكة الحديد الأولى فى الارضية والحوائط وقبل رص حديد الشبكة التانية

عشان تكون المواسير محصورة بين شبكتين الحديد

ويفضل تكون المواسير فى الحوائط وليس فى الارضية ( إلا ماسورة الصفاية مضطرين) حتى لا يتم الدوس عليها وكسرها من الحدادين أو أثناء الصب

والمواسير المستخدمة

مواسير PVC

بقطر 1.5 بوصة لمداخل المياة والمكنسة

و 2 بوصة للاسكيمر وصرف الارضية

وسباكة حمام السباحة بتتكون من :

أجهزة رئيسية

(1) الاسكيمر Skimmer

(2) المداخل ( وحدات دفع المياة للحمام )

Jet Nozzles

(3) المكنسة

(4) صفاية صرف الارضية Drain

أجهزة إضافية يمكن الاستعانة بها مثل

(5) نوافير

(6) شلال

(7) ألعاب

(8) جاكوزي

وبيتم مراعاة الاتى:

تجميع المواسير لتخرج من أحد جوانب الحمام الملاصق لغرفة الماكينات أو المكان إللى حيتم وضع فيه المضخة والفلتر

خروج المواسير من حائط الحمام بيتم عن طريق

وضع قطع من المواسير ( عددهم حوالى 7 ) على حسب مساحة حمام السباحة

طول كل منها حوالى 70سم

بيتم تثبيتها اثناء مرحلة المبانى

ليتم بياض المحارة وحلقمة العزل حولهم ( بيعتبروا مثل السليفات أو الجرابات )

تمر من داخل لخارج الحمام

على بعد حوالى 30 سم من الطرف العلوى للجدار ويراعى ان تكون أسفل سقف غرفة الماكينات

ويراعى عند توزيع الاجهزة

إن أى مقاس منسوب للاجهزة بيتم قياسه من منسوب المياة اى من منتصف الاسكيمر فى حالة نوع الحمام اسكيمر

وفى حالة حمام السباحة من نوع الأوفر فلو بيتم القياس من حافة الحمام العلوية لأنها نفس منسوب المياة

________________________________

مواصفات تركيب جهاز الاسكيمر

يراعى أن يكون الاسكيمر فى الجهة المقابلة للدفاعات

يفضل ألا يقل عدد الاسكيمر عن 2

ويراعى ان يكون حافة الاسكيمر أفقية تمام

ويكون الخط الواصل بين الاسكيمرات أفقي تماما نستلمه بميزان الخرطوم

ماسورة صرف الاسكيمر 2بوصة

لاحظ مقاس بروز بيتم تثبيته بحيث يكون وجهه بارز عن خرسانة الحائط ب٥ سم قيمة سمك مونة لصق السيراميك وسمك السيراميكه نفسها بالاضافة لخلوص تسوية لو الخرسانة غير مستوية

________________________________

مواصفات تركيب المداخل

نوعين

فيه منها بتركب على الجدران

Wall inlets

يفضل فى الجانب الطويل المقابل للاسكيمر

لانه كلما قلت المسافة بين الدفاعات والاسكيمر كان أفضل لدفع الشوائب بقوة للاسكيمر

وان تكون المياة الخارجة من الدفاعات فى نفس اتجاه الرياح السائدة

لتعمل المياة بمساعدة الرياح على دفع الشوائب للاسكيمر

ومهم جدا

أن تكون على مسافة حوالى 20 سم يتم قياسها من منتصف الاسكيمر (منسوب مياة الحمام ) حتى تساعد على دفع الشوائب العالقة بالسطح

وفيه نوع مداخل بيركب فى أرضية الحمام Floor inlets

والمداخل الارضية يفضل ألا يزيد المسافة بينها عن 5 متر فى المحور الطويل

و4.5 فى المحور العرضى

وعموما عدد المداخل مرتبط بمساحة الحمام

كل 25 متر مسطح او كل 45 متر مكعب من الحمام يحتاج عدد 1 مدخل ويفضل ان لايقل العدد عن عدد 2 فى الحمام

لاحظ ان المخرج ماسورة أفقية

على عكس مخرج الاسكيمر

________________________________

مواصفات تركيب مخرج المكنسة

بسمك 1.5 بوصة وعلى بعد حوالى 30سم من منسوب المياة

لسهولة الوصول إليه وتركيب الخرطوم

ويفضل يكون فى منتصف الجانب الطويل للحمام

حتى يصل خرطوم المكنسة لكل منطقة بأرضية الحمام

فيه نوع من أجهزة الاسكيمر به مخرج للمكنسة لا يفضل حتى لا ترتبط المكنسة بمكان الاسكيمر

ده غير أنه وجود مخرج خاص بالمكنسة أفضل فى حالة انسداد ماسورة

________________________________

موصفات تركيب مخرج صرف الارضية

يفضل يكون مخرج الصفاية قريب من تجميعة مخرج المواسير

حتى لاتستمر ماسورة الصفاية بطول أرضية الحمام

لانه غير التوفير فى المواسير بنخاف على الماسورة من الكسر

وبالتالى بنراعى فى تصميم الحمام ان يكون المنطقة العميقة بجوار مخرج المواسير وبجوار غرفة المعدات

سمك 2 بوصة وبيكون فى اوطى نقطة فى أرضية الحمام

ويفضل وجود مخرجين للصرف في الحمامات الأوليمبية و الترفيهية المسافة بينهم من 2 إلى 3 متر

الماسورة الرأسية للمخرج يفضل تكون بطول مناسب لتكون أعلى منسوب صب خرسانة الارضية ويتم قص الزيادة عند تركيب الصفاية

________________________________

فى حمام الأوفر فلو بيكون محتاج لخزان موازنة بجوار الحمام وحجم الخزان بيكون 1/10 (عُشر) حجم الحمام

بمعنى لو حجم الحمام 5×10×1.40 يساوى 56 متر مكعب

يبقى هنحتاج خزان حجمه حوالى 6متر مكعب اى بمقاس 2×2×1.50 يساوى 6 متر مكعب

________________________________

وغرفة الماكينات

ممكن تكون تحت الأرض!

وفى الحالة دى مهم عمل بيارة في ارضيتها جزء ساقط لتجميع المياة التى قد تنتج من تسريب المواسير أو من مياة الأمطار مرتبطه بمضخة صغيرة لشفط مياة الارضية المتجمعة.

او فوق الارض وبتكون بمقاس يتسع لحجم الفلتر المناسب لحجم الحمام

والمضخة شبيه بموتور المياة الموجود بالمنازل

المضخة تسحب المياة الغير نقية الواردة من الحمام وتدفعها للفلتر ثم للحمام مرة اخرى

والفلتر وظيفته ترشيح المياة فقط من الشوائب والأتربة العالقة لذلك فهو عبارة عن تانك به رمال متدرجة الحجم

والفلتر غير مسؤل عن تعقيم وتطهير المياة ضد البكتريا والطحالب

ولكن المسؤل عنها الإضافات الكيماوية مثل الكلور التى تضاف بنسب معينة تتناسب لحجم المياة

________________________________

توصيلات سباكة غرفة الماكينات

بيتم إدخال كل المواسير الخاصة بأجهزة الاسكيمر والمكنسة وصرف الارضية والدفاعات لغرفة الماكينات

وتركيب محبس على كل ماسورة

للتحكم فى إغلاق أو فتح المياة الواردة منه

وتجميع المواسير ( ماعدا ماسورة الدفاعات ) على ماسورة واحدة تذهب لمدخل المضخة أو الطلمبة

(المضخة لها مدخل ومخرج)

ونصل مخرج المضخة بمدخل جهاز الفلتر

والفلتر له مخرجين مخرج

واحد يتوصل بماسورة الدفاعات

والمخرج التانى يصل للصرف الصحى مباشرة فى حالة الاحتياج لتفضية مياة الحمام

وماسورة التغذية الرئيسية للمياة

إما أن تصل لماسورة الدفاعات

(لملو حمام السباحة )

أو تصل للفلتر ومنه للدفاعات

مع ملاحظة

تركيب لاكور تجميع للماسورة قبل اتصالها بالمضخة

ولاكور تانى بعد المضخة مباشرة

لتسهيل فك المواسير عن المضخة عند الحاجة لعمل صيانة للمضخة

ونفس الشيئ

تركيب لاكور للمواسير الداخلة والخارجة من الفلتر لسهولة فك الفلتر فى حالة الاحتياج لتغييره

وفى حالة حمامات السباحة الساخنة

بيتم تركيب سخان فورى أو غلاية

للماسورة الواصلة من الفلتر للدفاعات